تابعت تقارير الزملاء عن اجتماع مندوبي الاندية ظهر اليوم مع اتحاد الكورة في غزة .. الذي كان لقاء بث هموم وطرح مواجع .. وارسال الكرة الى ملعب أخونا جبريل الرجوب مع مناشدة ورجاء بتفعيل مكرمة الرئيس لدعم الاندية .. ووعد اتحاد الكورة بطرح الموضوع في الاجتماع الجاي لاتحاد الكورة المركزي في رام الله .
كلام جميل وكلام معقول مقدرش اقول حاجة عنه .. لكن خيال الوعد المجهول مش شايفين حاجة منه .. يخطئ اتحاد الكورة بوصف فلوس الرعاية او منحة الرئيس بأنها استحقاق مفروغ منه .. الاستحقاق مشتق من حق مستحق .. وهذا لا ينطبق على العلاقة بين الاندية والاتحادات .. حيث اتحاد الكورة وبالكلام البلدي مش مجبور حسب القانون على تمويل موازنات الاندية .. والحديث كله مجرد هبات أو مكرمات .. ممكن تيجي ممكن ما تجيش .
نتمنى على الرئيس ابو مازن ان يواصل تقديم الهبة المالية للاندية هذا الموسم أيضا اللي هيه ” نواية بتسند الزير ” ولا تغطي الا نسبة الربع أو اقل من موازنات الكورة في الاندية .. لكن على الاندية ان تتوقع كل شئ .. وما ترميش قربتها على هوا السحاب .. ممكن تمطر وممكن ما تمطرش .. وكل الامور واردة .. واعتقد انها مرتبطة بالحالة السياسية الفلسطينية .. لاول مرة من سنوات .. والسياسة فيها المفاجآت الكويسة والعاطلة .. واللي باين انو العاطلة اقرب من الكويسة .
الاندية اليوم لازم تبادر بتصويب أوضاعها وتخفيض مصروفاتها .. واللي قادر يواصل طريقه بنفس مصاريفه يتوكل على الله .. والنادي اللي مش قادر يجتمع بلعيبته وجهازهم الفني في جلسة مصارحة ومكاشفة .. ويخيرهم بين توقف نشاط الكورة .. او الحل الصعب وهو تخفيض مستحقاتهم المالية الى النصف .. يعني ريحة البر ولا عدمه .. القيادة الرياضية مش حتتضرر من توقف دورينا في غزة .. ومش حتبكي علينا كتير .. ومش حيطير النوم من عنيهم .. ولازم نحط هادي الحقيقة في بالنا .. وميت ام تبكي ولا أمي .. معظم انديتنا وصلت حالها بحالها لهالمواصيل .. مع انو كانت الحلول قدامها من سنوات لما بدأت طفرة أسعار اللاعبين .. كان لازم تهتم بقطاع الناشئين .. وأنديتنا مليانه بالموهوبين .. لكن الاندية استسهلت الجاهز وأهملت الأساس .. وتوقيف الدوري هوه انتحار خاصة للاندية اللي ما عندهاش غير هاللعبة .. يقعدوا ينشوا دبان ويلعبوا سيجة .. قطاعنا ما عندوش شركات ومؤسسات إقتصادية خاصة قوية قادرة إنها تشيل الكورة .
خلينا نكون واقعيين في كل خطواتنا .. وما نحلمش كتير .. وتضلوا بخير .
كلاكيت تاني مرة …إن وقعت يا فصيح .. لا تصيح .
